Cara Santa Rusulia,
quanti anni ca ‘un ti viu,
ca ‘un acchianu ccà nni tia
dintra a chista grutta tua!
Stamattina aju vinutu
‘nta na jinnata china ‘i suli
respirannu l’aria frisca
sutta u celu tuttu azzurru.
Doppu tutta ‘a scalinata
‘na tò casa iu trasivu
sutta petri e sutta rocci
ca scantari nun ti fannu.
La tò statua d’u Seicentu
tutta è in marmu di Carrara;
cu na lamina dorata
tu ti curchi ‘ntra gli ex voto:
arricriata e assai cuntenta
dell’amuri di Palermu.
C’era paci ‘ddà nni tia,
‘nmenzu a picca piddirini
ca prijavanu ‘n silenziu
senza scrusciu e battarìa.
Quarant’anni hannu passatu
di quann’è ca nni ‘ncuntrammu,
iu era forti e picciutteddu,
ma tu eri sempri ‘a stissa:
cosa sunnu quarant’anni
pi tia ca sì santa e eterna?
Acchianannu ‘o belvedere
e taliannu mari e munti,
vinni sutta ‘a statua tua
ca talia tutta Palermu
tra li munti e ‘n faccia ‘o mari.
E siccomu sutta u celu
semu tutti piddirini,
puru iu vuosi pruvari
a mannari ‘na prijera.
Si ci sù lacrimi assai
tu l’asciuca c’u tò amuri!
Si c’è chiantu e suffirenza
siddu poi, dùnaci adienzia!
Siddu troppu è stu duluri,
prea tu pi tutta Palermu!
Dilla tu la tò prijera
p’a tò terra turmintata.
E si poi t’arresta tempu,
tu daccilla ‘na taliata
a ‘sta Italia sbinturata,
a stu munnu sdirrubbatu!
Duna ciàvuru di paci,
duna tutta la tò luci,
duna a tutti la spiranza,
duna amuri e tolleranza,
cuarìa i còri arripudduti,
arrifrìscanni li menti,
e lu nìvuru d’a morti
tu l’hai a tìnciri d’azzurru!
Dicci a cu sfrazìa e cumanna
ca nun avi sensu ‘a guerra,
non in celu e mancu in terra,
ed i missili e i droni
canciaccilli in ciuri e rosi.
Mentri scinnu giù ‘n Palermu
iu mi votu e ti taliu,
ti salutu spiranzusu,
tornu menu disfizziatu.
Un aceddu supra ‘i mia
vola altu su Palermu:
ora acchiana drittu ‘n celu,
ora scinni jusu a mari.
Accussì forsi è sta vita,
fra scinnuti e acchianàti,
ora tinta e allaccaruta,
ora bedda comu u suli.
Acidduzzu, tu ‘un ti scanti
di taliari ‘n facci ‘u suli:
dimmi comu avissi a fari
s’u vulissi anch’iu taliari,
drittu ‘n menzu ‘a la so luci,
pi truvari amuri e paci.
MP
Palermo, 19 ottobre 2022
